أثارت الإعلامية دعاء فاروق جدلاً واسعاً بعد منشورها الأخير، التي كتبته عبر حسابها الشخصي على "فايسبوك"، حول الحجاب، وقالت إنّ الحجاب ليس فرضاً أو سنة، وإنما هو أمر مباشر من رب العالمين، مثله كمثل غض البصر وحفظ الفرج في الآية الكريمة التي وردت في سورة النور عن الحجاب.
وقالت: "الحجاب مش فرض.. صح انتوا صح هو فعلاً مش فرض.. والله يجازي اللي كان السبب اللي اخترع كلمة فرض دي ولزقها في الحجاب… وكأنّ المقابل ليها أنه سنة"، موضحة أنه أمر مباشر من الله وعلى المرأة اتباعه دون مناقشة أو جدل... ده كلام ربنا.. ده القرآن الكريم بدون تفسير من حد ولا توجيه من حد.. ده من ربنا لينا على طول لا شيوخ ولا مفسرين ولا غيره.. مش احنا عندنا عقل نفكر بيه وبنفهم لوحدنا؟ اديني قعدت لوحدي خالص افصصها بدماغي من غير أي مؤثرات والمصحف".
وتابعت: "مفيش كلمة هتيجي في القرآن مالهاش لازمة أو مالهاش فايدة وبالتالي لما ربنا يحطها في سياق الأمر المباشر يبقى منتفلحسش ونقول لا أصلها مالهاش معنى ولا تدل على شيء!!! والجملة الدارجة اللي مبسمعش غيرها؛ ما لو ربنا كان عاوز يقولنا اتحجبوا كان قالها صريحة!! يا صلاة النبي!!!! ربنا سبحانه وتعالى هيقولنا اتحجبوا يا بنات؟!!!!! ليه بنسمع شريط عمرو خالد؟!!!!".
واستكملت: "الشعر مش زينة خالص هو تاج المرأة وتلات أربع حلاوتها متغطية بتغطية شعرها.. راجع تحدي العشر سنين وشوف اللي كانوا محجبات وقلعوا شكلهم بقى ايه..؟!!! طبعا احلووا مليوووون مرة واللي تقول غير كده كدابة في أصل وشها لامؤاخذة".
وأضافت: "والله كان بودي أخلع الحجاب أنا كمان وأظهر أصغر من عمري بعشرين سنة بس مش هقدر أعمل كده لأن الآية واصلالي صريحة ومافيهاش أي لبس.. والموضوع متقفل من جميع الجهات… هارد لاك يا بنات والله كان نفسي أوجب بأيتها حاجة بس مش نافع".
واختتمت: "بس يا تري لو حد مغضش بصره هل من حقي اعلّق له المشانق؟؟ هل هعرف اصلا؟؟ ما كلهم بيبصوا من تحت لتحت هي البصة هنمسكها ازاي؟ لو حد مصلاش هل دي حاجة انا ليا فيها؟؟؟ لو حد مدفعش فلوس زكاته انا هعرف منين أساسا؟؟؟ هو بس الحجاب اللي واقفين قايمين نايمين بيه ايه اللي دخلكم في اللي مالكوش فيه اصلا... خليك في نفسك يابا منك ليه جتكو الهم كل واحد فيه العبر وماسك لي في اللي لبست واللي قلعت.. ارزقنا حسن الخاتمة".