خرج الموزّع الموسيقي أحمد إبراهيم عن صمته، بعد خلاف نشب بينه وبين أحد الصحفيين، عندما انتقد الصحفي ظهوره ببرنامج "توأم روحي" بصحبة أنغام مع الإعلامي اللبناني نيشان، والمقرر عرضه خلال شهر رمضان المُقبل، لافتاً إلى أنّ أنغام احضرته من المدرسة كي تحضر معه حلقة البرنامج، مُلمحاً إلى فارق السن بين أنغام وزوجها.
أوضح الموزع الموسيقي أنّ ما يكتبه هو رسالة لكل من يتجاوز في حقه وحق زوجاته، لافتاً إلى أنّه قرّر حذف الشتائم والسُباب احتراماً لمتابعيه، قائلاً: "دي رسالة لكل واحد هيتجاوز من هنا ورايح، أولاً بشكر كل صحفي وإعلامي احترم رغبتي في عدم التعليق على الكلام الكتير آخر فترة، لكن واضح إن السكوت عند بعض الناس بقى يتفهم غلب وخوف ومحدش بيقدّر احترام الواحد لخصوصياته.. أنا بعرف اتجاهل على فكرة وكنت سكت طول الفترة الأخيرة ورفضت ألف برنامج للرد على تجاوزات في حقي وحق زوجتي التانية أو اتهامات كاذبة في حق زوجتي الأولى منسوبة ليا واتهامات من ناس سفلة عاملين (حبايب وقرايب) بيسخنوا الدنيا ضدي وضد زوجتي التانية غيرة وغل لكن ربنا الحافظ".
واستكمل: "ولأني كبير واعرف ادير بيتي ازاي ومش من هواة الرد و١٧ سنة شغل لا جريت على مادة ولا شهرة لاني شبعان ولاني بتقي الله وبستخيره في تصرفاتي وباخد قراراتي بنفسي واللي عارفني عارف مين أحمد إبراهيم .. اللي في الصورة معايا دي مراتي وحطاني فوق دماغها وبترضيني قبل ما تبقى نجمة وأهم مطربات مصر والوطن العربي.. محدش بيجبر حد على حاجة واللي في الصورة معايا لا خدتني من بيتي وولادي ولا خربت بيت حد ولا ألف شخص يقدروا يحرموني من ولادي.. ولادي في حضني وهما وأمهم (بنت الاصول) في رقبتي وعايشين في خيري ومن عرقي ومحدش اشتكى عشان حضرتك واللي زيك يشحت بيهم و الحمد لله ولادي زي الفل ومعايا ومامتهم فوق دماغي وشايلة لسه اسمي ووش الخير عليا وسواء كملنا أو انفصلنا هتفضل أم ولادي وكله نصيب ومش ضعيفة عشان حد يدافع عنها".
وأضاف: "اللي قدامك وبتقول عليه قد ابنها ده ده عنده ٣٦ سنه ومخلف ولدين واحد فيهم ٨ سنين ومتجوز ٢ وفاتح بيتين واتمرمط واشتغل ألف شغلانة وهو صغير وبيساعد في فتح بيوت كتير بفضل ربنا من صغره.. وفرق السن يا جاهل اللي بيني وبين مراتي ١١ سنه يعني أقل ٤ سنين من الفرق اللي بين السيده خديجه والنبي "ص".. اللي في الصورة ده واخد جوايز ومتكرم كأحسن موزع في مصر والوطن العربي آخر ١٧ سنة أكتر ما انت دخلت الحمام وصاحب أهم بصمات ونجاحات ناس أكبر منه في السن ماحققوش ربعه وبفضل الله أعلى سعر موزع موسيقى حالياً مع اتنين تلاتة كمان من جيله على مستوى الوطن عربي.. اللي بتهاجمه ده عشان تضحك المرضى اللي شبهك عمل أغنية اسمها على بالي لشيرين من ييجي ١٥ سنة وهو بيدرس وبيشتغل شغلانتين ويصرف على نفسه كسّرت الوطن العربي وله بصمه في تاريخ نجوم الوطن العربي وقت ما حضرت كنت بتاخد المصروف من ماما".
وتابع: "إذا كانت السخرية من خصوصيات الناس موضة فمحدش هيضحك غير اللي شبهك اللي معندهمش أصل ولا شافوا خير.. وبالمناسبة أنا مش مضطر اطلع أدافع أو أبرر واتكلم في أسرار بيتي وأرد على اتهامات عشان اخد بونت على حساب أم ولادي وافضح بيتي وارضي واحد زيك، انا ولادي في حضني وامهم لسه في رقبتي وفوق دماغي ومحدش اخدني من بيتي وولادي ولا حد يعرف يعملها انا اتجوزت على سنة الله ورسوله وراضيت ربنا
كفاية متاجرة بولادي وامهم ونواح وعياط بحياتنا الشخصية محدش طلب تدخلكم في امور بيتي ولا حد يعرف اسرار البيوت.. أولادي أو أي واحدة من زوجاتي الاتنين عايشين من عرقي وأنا قادر اتجوز كمان اتنين لو عاوز الحمدلله".
واستطرد قائلاً: "من هنا ورايح اللي هيوصلي انه غلط فيا أو جاب سيرة اي واحدة من اللي في رقبتي أو تاجر وشحت بحكايتها أنا همسح به الارض ومش هكتفي بالقضاء انا هروح اضربه بــ (.... جزمة) أنا لا جاي من نيو جرسي ولا متربي في بوقي معلقة دهب أنا من بورسعيد وشقيت وواخدها من تحت وبعرف أرد بأدب وبعرف أسب واضرب كمان لتدخلك في حياتي الشخصية والسخرية مني ومن مراتي.. ودي قضية جديدة اتحركت زي غيرها".
واستكمل: "أحمد ابراهيم طول عمره بيحترم الجميع وراجل وتعب ونجح وهيكمل مشواره وسعيد وراضي وبيتقي الله واللي يعرف يعمل زيه يعمل ويمشي في الصح ويرضي ربنا يعمل، أنا هرد لما يجيلي مزاج ومحدش يقول امسح البوست وماتديش قيمه لاني عارف بكتب ايه وامتى ومحدش وقف معايا في معركتي غير ربنا.. وأخيراً من حق أي واحدة من زوجاتي رفض الوضع وهو حقها وهعمل اللي يرضيها وفوق دماغي لان كرامة أي واحده منهم من كرامتي".
واختتم: "أخيرا بعتذر لاهلي وقرايبي وحبايبي وحتى نسايبي عن أي تجاوز في حقي وحق بيتي اضرهم بسبب التضليل والحشرية و حسبي الله في كل من ظلمني.. تم تعديل البوست وحذف الالفاظ احترام لحضراتكم".