سحر رامي: مش كل الفنانين معاهم فلوس زي محمد رمضان وبأمارة إيه يكون خليفة أحمد زكي

تحدثت الفنانة سحر رامي، عن الصعوبات التي يواجهها الفنانين في مهنة التمثيل، لافتة إلى أنهم ليسوا أغنياء كما يظن البعض.

وفي تصريحات صحافية، قالت سحر رامي: "الناس فاكرين أن كل الفنانين بيلعبوا بالفلوس وعايشين في قصور، ولكن مع الأسف مش كلنا محمد رمضان ومننا مش لاقيين فلوس يصرفوا على عيالهم وبيوتهم؛ لأن مهنة الفن صعبة وكلها حظ ومواسم".

وتابعت: "الزمن اتغير ودلوقتي كل فنان بقى معاه 5 مساعدين، واحد يولّع له سيجارة ومساعد تاني يجبله أكل، إحنا زمان مكناش كدا ومع الأسف التكنولوجيا والتمثيل بقى أسهل من زمان، ولكن مع الأسف الفكر راح، وأي واحد بيقول نكتة بيفتح الكاميرا وبيعملها مسلسل".

وعن مقارنة محمد رمضان بالراحل أحمد زكي، قالت سحر رامي: "مقارنة محمد رمضان مع أحمد زكي مستحيلة؛ ده ظلم لأن مفيش حد شبه التاني".

وأردفت: "مفيش حاجة اسمها فنان له خليفة، بأمارة مين محمد رمضان خليفة أحمد زكي؟ ده العصر مختلف والأدوار مختلفة وحتى الأرقام اتغيرت مكنش فيه حد زمان بياخد المبالغ الموجودة دلوقتي".