محمد رمضان: "أنا محدش بيكرهني" ونجاحي بيقزم ناس في مجالي
كشف الفنان محمد رمضان، خلال لقائه مع الإعلامي الإماراتي أنس بوخش في برنامج «ABtalks»، عن رؤيته للانتقادات التي يواجهها أحيانًا، متحدثًا بصراحة عن طبيعة علاقته بالجمهور وتأثير خطواته المهنية على من حوله.
وقال محمد رمضان: «والله أنا مبشوفش حد بيكرهني، بالعكس الجمهور بتربطني بيه علاقة نادرة مش بتحصل بين فنان وجمهور كتير، ممكن يكون بعض الناس اللي مثلاً خطواتك بدون ما تشعر تؤذيهم، أحيانًا بتكون بتعمل خطوات في مجالك بتقزم زمايل ليك في نفس المجال من دون ما أنت تشعر».
وأضاف موضحًا فكرته حول سوء الفهم الذي قد يحيط ببعض النجاحات: «أنا مقصدش أن أعمل ده عشان أنت تحس أن إيه ده هو بيكشفني… ده مش بيجي في دماغي، أنا باخد خطوات كل خطوة بتشاور على الخطوة اللي بعدها».
وتطرق محمد رمضان إلى طموحاته الفنية خارج الإطار المحلي، قائلاً: «أنا بوصل لمرحلة بيبقى تركيزي إيه الخطوة اللي بعدها… كان كل طموحي إني أكون بنفس الشهرة والحب والتقدير في دولنا العربية».
كما تحدث عن صعوبة المنافسة في بعض الأسواق الفنية العربية، موضحًا: «دي أصعب دول بيجولهم نجوم العالم… فكان لازم أفكر في استراتيجي إيه اللي أصدره عشان الجمهور دا يبدأ يحس أنك نجم ميبصلكش نظرة دونية مقارنة بالنجوم الغرب».
وعلى الصعيد الفني، يواصل محمد رمضان نشاطه السينمائي، حيث ينتظر عرض أحدث أفلامه «أسد»، الذي يضم نخبة من النجوم، ويأتي من إخراج محمد دياب، مع فريق عمل فني كبير في مختلف عناصره الإنتاجية.