رضوى الشربيني تهاجم أحمد العوضي على وصفه بـ النجم "الأعلى أجراً"
أثارت الإعلامية رضوى الشربيني موجة واسعة من التفاعل على مواقع التواصل الاجتماعي بعد منشور علقته بشكل غير مباشر على تصريحات الفنان أحمد العوضي الأخيرة، التي أعلن فيها أنه الأعلى أجراً في مصر.
في منشورها، قالت الشربيني موجّهة تعليقها إلى كل من يتحدث عن إنجازاته ومكاسبه: "اللي يتكلم عن إنه بقى الأعلى في الاسم والأجر، المفروض كمان يتكلم عن مين اللي وصّله لهناك، ويتكلم عن فضل ومعروف الناس اللي خلّته يوصل لكده… ده إذا كان أصلًا الأعلى… لأنه مفيش حد أعلى غير ربنا سبحانه وتعالى. عامةً كل واحد وتربيته، واللي بيزرع خير أكيد آخرته هتبقى خير، واللي بيزرع شر أكيد نهايته هتبقى زيّها".
وكان الفنان أحمد العوضي، قد حرص على التواصل مع جمهوره من خلال بث مباشر عبر صفحته الرسمية على "فيسبوك"، احتفالًا بعيد ميلاده، مؤكدًا أن الدعم الجماهيري كان السبب الرئيسي في تصدره المشهد الفني.
وخلال البث، شدد العوضي على أن نجاحه جاء بفضل مساندة جمهوره المستمرة، معتبرًا نفسه «رقم واحد» بدعمهم، وهو ما يدفعه دائماً إلى رد الجميل عبر تنظيم مسابقات وتقديم جوائز لهم.
وقال أحمد العوضي: "الحمد لله ربنا كرمني من واسعة أنا النهاردة النجم الأعلى أجراً في مصر والأعلى مشاهدة والأعلى مبيعاً والحمد لله أما بنعمة ربك فحدث ودا بدعم وإخواتي ليا وأقل حاجة اقدمها لكم المسابقة ونفرح مع بعضينا والمليان بيودي على الفاضي أنت ليك فضل عليا بعد ربنا وأنا بحاول ابسطك على قد ما أقدر".
وتابع العوضي حديثه مؤكدًا تطلعه لمواصلة النجاح خلال الفترة المقبلة، قائلًا: "وإن شاء الله السنة دي نكمل مسيرة النجاح ونبقى الأعلى والأعلى يبقى لايق على الأغلى، لأن الأعلى مشاهدة هو الأغلى سعرا أغلى مبيعا، مينفعش أبقى أغلى واحد ومبقاش أعلى مشاهدة عيبة في حقي، ف إن شاء الله نبقى السنة دي الأعلى مشاهدة ويبقى الفرق بينا وبين التاني والتالت زي من هنا لمطروح زي السنة اللي فاتت".