أحمد العوضي: "أنا مش سنجل" وربنا يحقق لي أمنية الزواج والانجاب

كشف الفنان أحمد العوضي كواليس البث المباشر الذي ظهر فيه مؤخرًا وأثار جدلًا واسعًا، خاصة بسبب تصريحاته المتعلقة بالزواج، وذلك خلال لقائه مع الإعلامية إسعاد يونس في برنامج «صاحبة السعادة».

وقال أحمد العوضي: «أنا عمري ما قُلت إني سنجل، أنا مش سنجل، وقولت في اللايف إني هتجوز، اللايف ده عمل مشاكل كتيرة جدًا، أنا عملته يوم عيد ميلادي، وأقداركم من أفواهكم، أنا عارف أنا بقول إيه ومدرك أنا بقول إيه، مش بقول كلام وأرجع أعتذر، اللايف ده ضايق ناس كتير جدًا بس مش إخواتي، أنا عايش في عالم العوضي وإخواته، دايمًا كلامي موجه لإخواتي، لا أتعرض بإهانة لأي حد برة العالم ده وبسيب اللي يتكلم يتكلم».

وأضاف العوضي متحدثًا عن رغبته في الزواج وإنجاب طفل: «أنا بقول أمنية عشان ربنا يحققها لي، هو أنا لما أقول عايز أتجوز وأجيب ولد هو أنا غلطت في حد؟ دي سنة ربنا، أنا مش هفضل أحمد العوضي قوي البنيان، أكيد هكبر وأبقى عايز يبقى عندي عيل صغير أسند عليه».

وتابع حديثه كاشفًا عن ملامح طريقته في تربية ابنه مستقبلًا، قائلًا: «زي ما أبويا علمني هربي ابني، لأن الصدق والمبادئ والرجولة مش بتتغير، الأصول مش بتسقط بالتقادم، آه الزمن اتغير وطريقة التربية اتغيرت، لكن اللي اتربيت عليه في الرجولة لازم ابني يتعلمه عشان يطلع حلو، مش حلو المنظر، يطلع واد راجل، لازم عشان يطلع راجل يتعلم اللي أنا اتعلمته».

يُذكر أن أحمد العوضي كان قد ظهر في بث مباشر عبر صفحته الرسمية على فيسبوك احتفالًا بعيد ميلاده، وأخبر جمهوره أنه سيحتفل معهم في العام المقبل بحضور زوجته، وفي العام الذي يليه سيكون برفقة ابنه.