إحدى بطلات "أب ولكن": ندمت على مشاركتي بالمسلسل والكواليس "مش حلوة"

أعربت الفنانة سلوى عثمان عن ندمها على المشاركة في مسلسل "أب ولكن" الذي يعرض حاليا في الموسم الرمضاني 2026.

قالت سلوى عثمان: "مسلسل (أب ولكن) أنا محبش اتكلم عنه، كواليسه ماكانتش حلوة، وندمانة إنى اشتغلته، بعتبر إني نزلت رمضان السنة دى بـ(كلهم بيحبوا مودي) بس، مش بعتبر نفسى شاركت فى (أب ولكن)".

وتابعت سلوى عثمان: "كواليسه مكنتش حلوة، حتى فى كتابة الأسماء على التتر ما تفهمش هو انتقام أو كره في كتابة الأسماء، فعايزة اعتبر نفسى معملتوش ابدًا".

واستكملت سلوى عثمان: "كلهم بيحبوا مودي" أحلى كواليس وأحلى مسلسل، وياسر جلال عامل دور جميل جدا، وأيتن عامر وميرفت أمين، وطبعا المنتجة الكبيرة مها سليم كانت عاملة صورة جميلة، وكمان أستاذ أيمن سلامة كاتب حاجة حلوة وخفيفة على القلب وكلها كوميدي بس بدون أي ابتذال، وطبعا رب العمل أستاذ أحمد شفيق، فلما تبص على "مودي" تلاقي كواليس حلوة ونجوم حلوة وناس قلوبهم كلها حلوة، القلوب الوحشة بتبان بعد كدة، كان من أسعد الأوقات اللي شاركت فيها".

وأضافت سلوى عثمان: "أنا السنة دي مقدمة عمل كوميدي، المفروض إن "أب ولكن" كان يبقى فيه قضية كدة، بس محبتوش ولا حبيت كواليسه واكتشفت ده بعد ما اشتغلت، مكنتش عارفة إنه هيبقى بالطريقة دي".

يشارك في بطولة مسلسل "كلهم بيحبوا مودي" كل من النجم ياسر جلال وميرفت امين وايتن عامر ومصطفى ابو سريع وهدى الاتربي وغيرهم من النجوم، وهو من اخراج احمد شفيق وتأليف أيمن سلامة.

مسلسل "أب ولكن" من بطولة محمد فراج، وهاجر أحمد، وإسلام جمال، وركين سعد، وسلوى عثمان، تأليف ماريان هاني، وإخراج ياسمين أحمد كامل.