نفى الفنان حسام حبيب ما تردد خلال الساعات الماضية عن إلقاء القبض عليه بتهمة تجارة المخدرات، مؤكدًا أن ما يُثار مجرد شائعات هدفها الضغط عليه للابتعاد عن الفنانة شيرين عبد الوهاب.
وخلال مداخلة هاتفية مع الإعلامية بسمة وهبة عبر بث مباشر على حسابها بموقع "إنستجرام"، قال حسام حبيب: "إشاعة القبض عليا مش مظبوطة ومعروف مين بيطلعها. دي حملة ممنهجة ضدي، والمرة دي فيها غلط كبير بسبب تسريب تحقيقات النيابة. أنا كل مرة بسكت إكرامًا لشيرين، لكن مش فاهم ليه الشخص دا قلبه قاسي بالشكل ده.. وأنا واثق إن ربنا هيجيبلي حقي".
وأضاف: "الضغط اللي بيتعمل عليا كبير، بدل ما يشوه أخته ويشوهني يروح يبص على نفسه. وقت خلافاتنا كان بيتقال كلام مش حقيقي زي دلوقتي. هو بيعتمد على إن أنا ما بردش حفاظًا على العِشرة وأخته، لكن أقسم بالله مش هسيب حقي".
وتطرق حسام حبيب للحديث عن وضع شيرين عبد الوهاب، قائلاً: "بقالي أسبوع بكلم كل أصحابها المحترمين أطلب منهم يساعدوني، مش عشاني لكن عشان هي. كل الشائعات دي معمولة عشان يخوفوني ويبعدوني عنها، وأنا مش خايف على نفسي بقدر خوفي على أهلي. مش هسيب شيرين تتأذي بسبب الضغط ده. لو الناس ما وقفتش جنبها دلوقتي، مين هيقف جنبها؟".