كشفت الفنانة هبة السيسي عن كواليس صعبة من رحلتها مع المرض، موضحة سبب تمسكها بالظهور بدون شعر مستعار بعد فقدان شعرها نتيجة العلاج الكيماوي.
وخلال لقائها في برنامج قعدة ستات، روت تفاصيل اللحظة التي تساقط فيها شعرها، قائلة: "بعد أسبوع من أول جلسة كيماوي شعري وقع فجأة مرة واحدة، في يوم باليل شعري ابتدى يقع خصل كبيرة كمية شعر كبيرة بتنزل، دخلت أخدت شاور شعري كله وقع من المايه وجالي انهيار عصبي، بشوف نظرات من النساء بتتخض لما تشوفني أو يبصوا باستغراب أو يتوشوشوا لما يشوفوني مش بيحترموا مشاعري".
وأكدت رفضها ارتداء "باروكة"، مضيفة: "رافضة ألبس باروكة عشان حسيت بمعاناة المريضات قررت أكون واجهة ليهم كلهم إني متكسفش من شكلي مش هيهمني أي حد هواجه الناس كفاية الألم والتعب اللي بمر بيه، مش هلبس باروكة عشان الشكل مش كل حاجة إحنا كده كده شكلنا بيتغير طول الوقت وهنكبر الجمال مش دايم اللي دايم السلام النفسي وروحنا".
وتحدثت عن الجانب النفسي للتجربة، قائلة: "أنا فخورة بنفسي بس عايزة الناس يحسوا بمريض السرطان لأن التجربة قاسية وصعبة أنا واحدة من الناس وأنا برا دايرة مرضى السرطان مكنتش حاسه ولا فاهمة هما بيمروا بإيه، بيمروا بظروف صعبة واكتئاب أنا إنسانة وعندي مشاعر بقعد أوقات كتير بزعل على نفسي وبكلم ربنا وأنا راضية بالابتلاء دا بس بقعد أقول يارب خفف عني وشيل عني وخرجني من الهم والكرب اللي أنا فيه، بقعد أعيط طول الوقت مش عشان متضايقة من شكلي أنا تعبانة".
وعن عودتها للظهور الإعلامي، قالت: "قدرت أرجع للبرنامج وأطلع للناس بعد ما وصلت لمرحلة تقبل اللي أنا فيه، لما تقبلت إني خلاص مريضة ومرحلة وإن شاء الله تعدي وإني هنتصر على المرض في اللحظة دي قررت أمارس حياتي الطبيعية عادي وهنزل شغلي، مش قادرة لسه أخرج في مكان عام عشان نظرات الناس، لسه خايفة من مواجهة الناس عشان لما يشوفوني ميتكلموش عني".
كما ردت على اتهامات السعي وراء "الترند"، قائلة: " قالوا اني طالعة من غير باروكة عشان الترند، يعني أنا عشان أطلع ترند أو اتشهر أو الناس تتكلم عليا جبت لنفسي المرض وأديت لنفسي كيماوي أنا مريضة سرطان وباخد كيماوي وهو ده وضعي الحالي أتاجر بإيه يا جماعة عايزني أعمل إيه أقعد في البيت، أنا قررت إني مش هلبس باروكة عشان اللي زيي يبقى عندهم ثقة في نفسهم وميتكسفوش من نفسهم، ويا جماعة متتكسفوش من حد عيشوا حياتكم".
وكانت هبة السيسي قد أعلنت إصابتها بالسرطان عبر برنامجها ميس إيجيبت، في أول ظهور لها بعد إجراء عملية جراحية، حيث قالت: "النهاردة أول حلقة ليا بعد فترة صحية كانت صعبة جداً بعد إصابتي بالسرطان وعملت عملية كبيرة بس الحمد لله ربنا كرمني وعدت على خير".
وأضافت: "حابة أطمن كل الناس اللي سألوا عليا وقلقوا عليا ودعولي من قلبهم أنا الحمد لله بقيت كويسة، بس الفترة اللي فاتت خلتني أحس يعني إيه دعوة طالعة بصدق من القلب ويعني إيه في ناس حلوة وجميلة موجودة واقفة في ضهري من غير مقابل، حابة أشكر كل الناس اللي سألت عليا سواء برسالة أو بمكالمة أو زيارة أو حتى دعوة لأن دعواتكم فرقت معايا جداً أنا كنت داخلة في موضوع كبير والحمد لله كلامكم الجميل وصلني وكان دعم ليا في وقت بجد أنا كنت محتاجة الدعم وكنتوا فعلا سند حقيقي ليا".
واختتمت حديثها برسالة مؤثرة: "النهادرة أنا راجعة بطاقة جديدة وحابة أقول لأي حد بيمر بتجربة صعبة أنتوا أقوى مما تتخيلوا وربنا هيسخر لكم اللي يسندكم ويدعمكم ومفيش أقرب من ربنا في أي وجع شكرا ليكم جدا".