كشفت النجمة هديل خيرالله، التي أدت دور الطفلة "بلية"، معلومات جديدة ولأول مرة عن فيلم "العفاريت"، الذي جسد دور البطولة فيه النجم عمرو دياب، والفنانة مديحة كامل .
وقالت "هديل" عبر حسابها على "فيس بوك": "للناس اللي لسه مهتمة وبتسألني دايمًا، دول 9 معلومات عن فيلم العفاريت مش هاتعرفهم غير من بلية":
1- بيت عمرو دياب اللي في الفيلم دا مش بيته ولا حاجة دا سويت في شيراتون الجزيرة.
2- الفيلم اتصور في حوالي 6 أشهر، ما عدا مشهد واحد، توقف التصوير تمامًا لمدة 7 أشهر، وبعدين أتصور المشهد، ودا كان مشهد ميال ميال في الاستاد.
3- أول مشهد اتصور في الفيلم لبلية كان أول مشهد لبلية مع الكتعة اللي كان أول قلم علي وشي.
4- حفلة عمرو دياب في الفيلم كانت حفلة ليه بجد.
5- مشهد الشحاتة (اللي بدون حوار) كانت الكاميرا مستخبية في عمارة وكنت بشحت بجد ولميت فلوس.
6- المشهد بتاع "سرقت الخواجة كنتاكي" اتصور الساعة 3 صباحًا ولوزة نامت في التصوير واضطريت احفظ كلامها في ساعتها والحوار تم كله بيني وبين سقراط (لاحظ نومها في المشهد).
7- أنا ما كنتش في الشوال لما سقراط شاله.
8- دور بلية كان لبنت عمرها 8 سنوات وكان على وشك اختيارها بالفعل والمخرج حسام الدين مصطفى لما شافني كنت أقل من 6 سنوات واخترني.
9- بمناسبة إني كنت 6 سنوات كنا بناكل في الاستراحة بين المشاهد وعمرو دياب قعد في الكرسي اللي جمبي فقلتله "ماما لازم تقعد جنبي علشان تأكلني".