إدوارد يحذر من "حٌقن التخسيس" ويعلن إصابته بشلل في المعدة

كشف الفنان إدوارد عن معاناته من شلل مؤقت في المعدة، الذي تسبب فيه استخدامه لحقن التنحيف، وهي منتشرة بشكل كبير في الآونة الأخيرة. وبهذا، ينضم إلى قائمة الفنانين الذين أعلنوا عن تعرضهم لمشاكل صحية مشابهة بسبب هذه الحقن.

وشرح إدوارد في منشور طويل عبر خاصية القصص المصورة على حسابه في "إنستغرام" تجربته مع هذه الحقن، مؤكدًا أن المشكلة بدأت بعد استخدامه حقن الساكسندا، التي كان يتناولها تحت إشراف طبيب التغذية. وأوضح أنه تمكن من خسارة حوالي 15 كيلوغرامًا بفضل هذه الحقن، التي كانت تمنحه القدرة على التحكم في الجرعات لتفادي الإرهاق. ورغم النتائج الجيدة، إلا أن الشلل في المعدة كان من الآثار الجانبية التي عانى منها، مؤكدًا على أهمية الحذر عند استخدام هذه العلاجات.

وقال إدوارد: "كلام مهم جداً، أنا كنت باخد حقن التخسيس تحت إشراف دكتور تغذية، ونزلت حوالي 15 كيلو، كنت باخد حقن الساكسنده ودي الدكتورة نصحتني بيها، بس مشكلتها بتتاخد كل يوم في المعدة، وميزتها إننا نقدر نتحكم في الجرعات عشان ما نتعبش، ووصلت الوزن اللي أنا عايزه".

وأضاف: "دخلنا في مرحلة التثبيت الدكتورة طلبت مني أروح لدكتور جهاز هضمي أعمل تحاليل، ونطمن بس أنا طنشت وقولتلها أنا هاخد حقن أسبوعية بدل اليومية، عشان تعبت من كل يوم حقنة، وفي ناس نصحوني بالتروليستك لأنها أسبوعية، ومش قوية زي المونجارو، وفضلت آخد التروليستك لمدة 5 أسابيع كل أسبوع حقنة، وكانت تمام معايا وكانت برده دكتورة التغذية بتسألني على التحاليل كل فترة وكنت بطنش، لأني تمام مش حاسس بحاجة، وكمان لا كنت بتخن ولا بخس وباكل عادي طبعاً".

وتابع: "بردوا مواظب على دايت مع الدكتورة لحد الأسبوع اللي فات، فجأة مش جعان خالص وقعدت حوالي 4 أيام مش بدخل حمام ولا قادر آكل ووجع في معدتي جامد دكتورة التغذية قالتلي وقف الحقن وروح لدكتور جهاز هضمي فوراً، وعملت كده روحت لدكتور قالي حصلي شلل مؤقت من الحقن في المعدة، وكان مفروض تتابع معايا مع دكتورة التغذية، أنا اللي كنت بطنش عشان كنت تمام قالي الحقن مش وحشة ومفعولها كويس".

واختتم بالقول: "أنا بنصح أقصاها 3 شهور، بس تاخدها وتوقف فترة وارجع تاني بس لازم طبعاً بردوا متابعة مع دكتور تغذية من غير ما أطول عليكم أنا بقالي أسبوع بتعالج، وعملت كل التحاليل حتى صبغة على الكلى، والحمد لله معنديش غير زيادة أملاح، زي كل المصريين بطني بتتحسن واحدة واحدة، ولسه المعدة وجعاني، والدكتور قالي 9 أيام ترجع عادي وإن شاء الله هبقى كويس، أنا حكتلكم تجربتي عشان بقولكم إن الحقن مش وحشة وجابت نتیجة هایلة معايا، بس لازم مع دكتور التغذية، دكتور جهاز هضمي، وكمان دكتور قلب لو أمكن، عشان سرعة ضربات القلب أتمنى أكون قدمت لكم معلومات كويسة عن تجربتي وربنا يشفي أي حد تعبان وأشوفكم دايما كويسين".