كريم الشناوي: "إش إش" هو الأعلى مشاهدة ومحمد سامي "ميعرفش يعمل اللي بعمله"

تحدّث المخرج كريم الشناوي عن طبيعة المنافسة في موسم دراما رمضان 2025، وتنوّع الأعمال التي قُدّمت هذا العام، مؤكدًا أن تحقيق أعلى نسب مشاهدة لم يكن من أولوياته.

وقال الشناوي خلال لقائه في برنامج "ضيفي مع": "مسلسل "لام شمسية" مش الأعلى مشاهدة، المسلسل "إش إش" هو اللي حقق أعلى نسبة. لكن أنا مش بشتغل علشان أكون الأكثر مشاهدة، ده مش هدفي، اللي يهمني هو إني أكون واضح مع نفسي في نوعية العمل اللي عايز أقدمه، وإني أقدم عمل يعيش مع الناس".

وأضاف: "عمري ما كنت مؤمن بفكرة المنع، السوق لازم يكون فيه كل الأنواع، وأستاذ محمد سامي مثلًا شاطر جداً في اللي بيقدمه، بيعمل حاجة أنا معرفش أعملها، وهو في المقابل ميعرفش يعمل اللي أنا بعمله، وده شيء طبيعي وصحي".

وأكد الشناوي أن السوق بحاجة إلى التنوع، وأن قرار المتابعة في النهاية يعود للجمهور: "لو الجمهور مش عاجبه المحتوى، مش هيتفرج عليه، وبالتالي المنتج مش هيغامر بإنتاجه تاني. السنة دي السوق شهد تنوع واضح، والجمهور نفسه بدأ يتغيّر، وده أمر طبيعي ومتجدد".

يُذكر أن كريم الشناوي شارك في الموسم الرمضاني بمسلسل "لام شمسية"، الذي عُرض خلال النصف الثاني من رمضان وتكوّن من 15 حلقة.

المسلسل من تأليف مريم نعوم وورشة سرد، وإنتاج شركة ميديا هب – سعدي وجوهر، وإخراج كريم الشناوي. وضم العمل نخبة من النجوم، من بينهم: أمينة خليل، أحمد السعدني، محمد شاهين، يسرا اللوزي، ثراء جبيل، صفاء الطوخي، ياسمينا العبد، والطفل علي البيلي، إلى جانب مجموعة أخرى من الفنانين.